Institute of Hydrometeorology

გიორგი კორძახია - პროექტის ხელმძღვანელი , ფიზიკა-მათემატიკის დოქტორი, არის საქართველოს ტექნიკური უნივერსიტეტის ჰიდრომეტეოროლოგიის ინსტიტუტის უფროსი მეცნიერი თანამშრომელი და საქართველოს გარემოს დაცვის და სოფლის მეურნეობის სამინისტროს გარემოს ეროვნული სააგენტოს ჰიდრომეტეოროლოგიის დეპარტამენტის უფროსის მრჩეველი. დოქტორი კორძახია არის 150-ზე მეტი სამეცნიერო სტატიის ავტორი და ექვსი მონოგრაფიის თანაავტორი.

ლარისა შენგელია - პროექტის კოორდინატორი , ფიზიკა-მათემატიკის დოქტორი არის საქართველოს ტექნიკური უნივერსიტეტის ჰიდრომეტეოროლოგიის ინსტიტუტის მთავარი მეცნიერი თანამშრომელი. მას თანამგზავრული მეტეოროლოგიის დარგში მრავალწლიანი მუშაობის გამოცდილება აქვს. მისი ხელმძღვანელობით განხორციელდა შოთა რუსთაველის ეროვნული სამეცნიერო ფონდის პროექტები: 2009−2011 წწ. საგრანტო პროექტი GNSF/ST/5-432 „თანამგზავრული ინფორმაციის გამოყენების სისტემის შექმნა საქართველოში საზღვაო გადაზიდვებისა და ზღვის ეკოლოგიური უსაფრთხოებისათვის" (მკვლევარები: გიორგი კორძახია და გენადი თვაური), 2012 წლის სახელმწიფო სამეცნიერო საგრანტო კონკურსის „კვლევები მოსწავლეთა მონაწილეობით“ პროექტი SC/3/9-101/12 „კლიმატის თანამედროვე ცვლილებების ფონზე კავკასიონის ცალკეული მყინვარების არეალის შესწავლა თანამგზავრული მონაცემების საფუძველზე“ და 2014−2017 წწ. საგრანტო პროექტი FR/586/9-110/13 „თანამგზავრული დისტანციური ზონდირების საფუძველზე საქართველოს მყინვარების კვლევა“ (მკვლევარები: გიორგი კორძახია და გენადი თვაური). იგი აგრეთვე 20012−2014 წწ. სამეცნიერო ხელმძღვანელია საქართველოს ტექნიკური უნივერსიტეტის ჰიდრომეტეოროლოგიის ინსტიტუტის პროექტების: IHM-14-20 2437 „კავკასიონის მყინვარებზე კლიმატის ცვლილების ზემოქმედების შეფასება დისტანციური დაკვირვების ტექნოლოგიების გამოყენებით“, 2015−2017 წწ. IHM-17-35-CO-3692 „საქართველოს მყინვარების ევოლუციის კვლევა თანამგზავრული დისტანციური მეთოდოლოგიების და მიწისპირა დაკვირვებების მონაცემების საფუძველზე კლიმატის თანამედროვე ცვლილების ფონზე“ და 2018−2020 წწ. „საქართველოს მყინვარების დეგრადაციის შესწავლა და მათი დნობის პროგნოზირება კლიმატის თანამედროვე ცვლილების გამო“. ბოლო სამ პროექტშიც დოქტორი გიორგი კორძახია არის პასუხისმგებელი შემსრულებელი.

გენადი თვაური - პროექტის ძირითადი შემსრულებელი, ფიზიკა-მათემატიკის დოქტორი არის ივანე ჯავახიშვილის სახელობის თბილისის სახელმწიფო უნივერსიტეტის ე. ანდრონიკაშვილის ფიზიკის ინსტიტუტის მეცნიერი თანამშრომელი, რომელიც წლების განმავლობაში მუშაობდა უფროსი მეცნიერი თანამშრომლის თანამდებობაზე ივანე ჯავახიშვილის სახელობის თბილისის სახელმწიფო უნივერსიტეტის მ. ნოდიას გეოფიზიკის ინსტიტუტის კოსმოსური კვლევების ცენტრში, სადაც მის მოვალეობაში შედიოდა დედამიწის დისტანციური ზონდირების თანამგზავრული მონაცემების დამუშავება. დოქტორ თვაურს აქვს მაღალი კვალიფიკაცია თანამგზავრული დისტანციური ზონდირების სფეროში. იგი აქტიურად მონაწილეობდა შოთა რუსთაველის ეროვნული სამეცნიერო ფონდის 2012 წლის სახელმწიფო სამეცნიერო საგრანტო კონკურსის „კვლევები მოსწავლეთა მონაწილეობით“ პროექტში SC/3/9-101/12 „კლიმატის თანამედროვე ცვლილებების ფონზე კავკასიონის ცალკეული მყინვარების არეალის შესწავლა თანამგზავრული მონაცემების საფუძველზე“. იგი, როგორც ძირითადი შემსრულებელი მონაწილეობდა შოთა რუსთაველის ეროვნული სამეცნიერო ფონდის პროექტებში: 2009−2011 წწ. საგრანტო პროექტი GNSF/ST/5-432 „თანამგზავრული ინფორმაციის გამოყენების სისტემის შექმნა საქართველოში საზღვაო გადაზიდვებისა და ზღვის ეკოლოგიური უსაფრთხოებისათვის" და 2014−2017 წწ. საგრანტო პროექტი №FR/586/9-110/13 „თანამგზავრული დისტანციური ზონდირების საფუძველზე საქართველოს მყინვარების კვლევა“ 2009−2010 წლებში ხელმძღვანელობდა საგრანტო პროექტს GNSF-CNRS 09/559 „მეწყერსაშიში ზონებისათვის ნალექების სეზონური რაოდენობის განსაზღვრა თანამგზავრული მონაცემების საფუძველზე“ და არის ძირითადი შემსრულებელი შოთა რუსთაველის ეროვნული სამეცნიერო ფონდის პროექტის FR-19-8190 „მეწყრების და ღვარცოფების საშიშროების შეფასება საქართველოს ტერიტორიისთვის ნალექების სტაციონარული და თანამგზავრული მონაცემებით“.

გიორგი გულიაშვილი - პროექტის ძირითადი შემსრულებელი, ახალგაზრდა მკვლევარი, გეოგრაფიის მაგისტრი, გარემოს დაცვისა და სოფლის მეურნეობის სამინისტროს გარემოს ეროვნული სააგენტოს ჰიდრომეტეოროლოგიის დეპარტამენტის სტიქიური მოვლენების მართვის ექსპედიციის სამმართველოს უფროსი სპეციალისტი, როგორც გლაციოლოგი, აქტიურად მონაწილეობს მყინვარებზე მონიტორინგის სამუშაოებში. 2019 წლიდან, იგი, როგორც ჰიდროლოგი მონაწილეობს გაეროს განვითარების პროგრამა „კლიმატის ცვლილებისადმი ადაპტაციის შესაძლებლობების გაძლიერება საქართველოში“, ხოლო 2021 წლიდან როგორც ჰიდროლოგიური და მეტეოროლოგიური მოდელირების სპეციალისტი. მან მომზადა სადოქტორო ნაშრომი საქართველოს მყინვარების თანამედროვე მდგომარეობის შესახებ.

სოფიო ბერიძე - პროექტის ძირითადი შემსრულებელი ახალგაზრდა მკვლევარი არის გეოგრაფიისა და GIS ტექნოლოგიები მაგისტრი. 2019 წელს მან გაიარა სასწავლო ტური ნიდერლანდებში „კლიმატის ცვლილებით გამოწვეული პრობლემების ბუნებრივი გზით (Nature Based Solutions) გადაწყვეტა“. ამავე წელს მან მონაწილეობა მიიღო მყინვარის მასის ბალანსის მონიტორინგის ყოველწლიურ გლაციოლოგიურ ექსპედიციაში სვანეთის კავკასიონის მყინვარებზე. 2020 წელს იგი გახდა განათლების საერთაშორისო ცენტრის სტიპენდიანტი და მიწვეული სპეციალისტი მსოფლიო მყინვარების კვლევით ცენტრში − WGMS, ციურიხი, შვეიცარია. მან ციურიხის უნივერსიტეტის, გეოგრაფიის დეპარტამენტში გაიარა მყინვარის მასის ბალანსის კურსი, როგორც საველე დაკვირვებების, ასევე დისტანციური ზონდირების საშუალებით. მას გავლილი აქვს ტრეინინგები გეოინფორმაციული ტექნოლოგიების სისტემების და პროგრამების შესახებ. სოფიო ბერიძემ მოამზადა სადოქტორო ნაშრომი კლიმატის თანამედროვე ცვლილების გავლენით საქართველოს მყინვარების დეგრადაციის საკითხებზე.